hai aarzu ye ji men us ki gali men javen
aur khaak apne sar par man manti udaven
shor-e-junun hai ham ko aur fasl-e-gul bhi aai
ab chaak kar gareban kyunkar na ban men javen
be-dard log sab hain hamdard ek bhi nahin
yaaro ham apne dukh ko ja kis ke taiin sunaven
ye aarzu hamari muddat se hai ki ja kar
qatil ki tegh ke taiin apna lahu chataven
khajlat se khuun men duube ya aag se lage uth
laala ke taiin chaman men gar dagh-e-dil dikhaven
be-ikhtiyar sun kar mahfil men shama ro de
ham baat soz-e-dil ki gar tuk zaban pe laven
yahan yaar aur bardar koi nahin kisi ka
duniya ke biich ‘taban’ ham kis se dil lagaven
Leave a Reply