Faiz Ahmad Faiz
raushan kahin bahar ke imkan hue to hain
gulshan men chaak chand gareban hue to hain
ab bhi khizan ka raaj hai lekin kahin kahin
goshe rah-e-chaman men ghazal-khvan hue to hain
thahri hui hai shab ki siyahi vahin magar
kuch kuchh sahar ke rang par-afshan hue to hain
in men lahu jala ho hamara ki jaan o dil
mahfil men kuchh charagh farozan hue to hain
haan kaj karo kulah ki sab kuchh luta ke ham
ab be-niyaz-e-gardish-e-dauran hue to hain
ahl-e-qafas ki subh-e-chaman men khulegi aankh
bad-e-saba se vaada-o-paiman hue to hain
hai dasht ab bhi dasht magar khun-e-pa se ‘faiz’
sairab chand khar-e-mughilan hue to hain
Leave a Reply