Jahanzeb Sahir
pesh-ḳhema ye kisi ek musibat ka nahin
dukh hai kuchh aur miri jaan masafat ka nahin
ham mazafat se aa.e hue logon ka miyan
mas.ala rizq ka hota hai mohabbat ka nahin
jism ki jiit koi jiit nahin mere liye
ye vo saman hai jo meri zarurat ka nahin
thoḌi koshish se hi aa jaati hai ab niind mujhe
is ka matlab hai ki vo meri tabi.at ka nahin
ye to ḳhud chal ke nishane pe lage hain tere
daḳhl is men to koi teri maharat ka nahin
roz dariya men jo ik phuul baha deta huun
ye kisi dukh ka ishara hai aqidat ka nahin
ham hain haare hue lashkar ke sipahi ‘sahir’
fa.eda ham ko kisi ki bhi himayat ka nahin
Leave a Reply