Ishrat Afreen
jinhen ki umr bhar suhag ki dua.en di ga.iin
suna hai apni chuḌiyan hi piis kar vo pi ga.iin
bahut hai ye rivayaton ka zahar saari umr ko
jo talḳhiyan hamare anchalon men bandh di ga.iin
kabhi na aisi fasl mere gaanv men hui ki jab
kusum ke badle chunariyan gulab se rangi ga.iin
vo jin ke pairahan ki ḳhushbuen hava pe qarz thiin
ruton ki vo udaas shahzadiyan chali ga.iin
un ungliyon ko chumna bhi bid.aten shumar hon
vo jin se ḳhaak par numu ki ayaten likhi ga.iin
saron ka ye lagan ab ke fasl kaun le gaya
ye kis ki khetiyan thiin aur kis ko saunp di ga.iin
Leave a Reply