Chamak Jugnu Ki Barq-E-Be-Aman Malum Hoti Hai

Seemab Akbarabadi

chamak jugnu ki barq-e-be-aman ma.alum hoti hai

qafas men rah ke qadr-e-ashiyan ma.alum hoti hai

kahani meri rudad-e-jahan ma.alum hoti hai

jo sunta hai usi ki dastan ma.alum hoti hai

sahar tak sa.i-e-nala ra.egan ma.alum hoti hai

ye duniya to ba-qadr-e-yak-fughan ma.alum hoti hai

kisi ke dil men gunja.ish nahin vo bar-e-hasti hon

lahad ko bhi miri miTTi giran ma.alum hoti hai

ḳhizan ke vaqt bhi ḳhamosh rahti hai faza saari

chaman ki patti patti raz-dan ma.alum hoti hai

hava-e-shauq ki quvvat vahan le aa.i hai mujh ko

jahan manzil bhi gard-e-karvan ma.alum hoti hai

taraqqi par hai roz-afzun ḳhalish dard-e-mohabbat ki

jahan mahsus hoti thi vahan ma.alum hoti hai

qafas ki tiliyon men jaane kya tarkib rakkhi hai

ki har bijli qarib-e-ashiyan ma.alum hoti hai

na kyuun ‘simab’ mujh ko qadr ho virani-e-dil ki

ye buniyad-e-nashat-e-do-jahan ma.alum hoti hai