Shikasta-Dil Sajaya Ja Raha Hai

shikasta-dil sajāyā jā rahā hai

lahū se gul banāyā jā rahā hai

hai siilī miTTī kī ḳhushbū fazā meñ

hamārā dil jalāyā jā rahā hai

nahīñ rahnā mujhe apnoñ ke dil meñ

baḌā bhārī kirāya jā rahā hai

mohabbat ko ham apnā farz samjhe

hameñ farzī batāyā jā rahā hai

ḳhudā-e-ishq kā me.aar alag thā

so ḳhud ko phir banāyā jā rahā hai

mile the chand jiine ke bahāne

bahānoñ ko nibhāyā jā rahā hai

Leave a Comment