shikasta-dil sajaya ja raha hai
lahu se gul banaya ja raha hai
hai siili miTTi ki ḳhushbu faza men
hamara dil jalaya ja raha hai
nahin rahna mujhe apnon ke dil men
baḌa bhari kiraya ja raha hai
mohabbat ko ham apna farz samjhe
hamen farzi bataya ja raha hai
ḳhuda-e-ishq ka me.aar alag tha
so ḳhud ko phir banaya ja raha hai
mile the chand jiine ke bahane
bahanon ko nibhaya ja raha hai
Leave a Reply