ik apne silsile men to ahl-e-yaqin huun main
chhe feet tak huun is ke alava nahin huun main
ru-e-zamin pe chaar arab mere aks hain
in men se main bhi ek huun chahe kahin huun main
vaise to main globe ko paḌhta huun raat din
sach ye hai ik flat hai jis ka makin huun main
Takra ke bach gaya huun bason se ka.i dafa
ab ke jo hadisa ho to samjho nahin huun main
jaane vo koi jabr hai ya iḳhtiyar hai
daftar men thoḌi der jo kursi-nashin huun main
meri ragon ke niil se ma.alum kijiye
apni tarah ka ek hi zahr-afrin huun main
maana miri nashist bhi aksar dilon men hai
angina ki tarah magar dil-nashin huun main
mera bhi ek baap tha achchha sa ek baap
vo jis jagah pahunch ke mara tha vahin huun main
Leave a Reply