ru-e-zeba ko dikhate hain chale jaate hain
kyuun nazar mujh se milate hain chale jaate hain
hasrat-e-dil miri rah jaati hai dil hi men mire
farz kya aise nibhate hain chale jaate hain
aap se aisi tavaqqoa na kabhi thi mujh ko
sham-e-ummid bujhate hain chale jaate hain
kuchh to adab-e-mohabbat ka karen pas-o-lihaz
kya yunhi dil ko lagate hain chale jaate hain
charagar hain to karen aa ke miri charagari
dard-e-dil aur badhate hain chale jaate hain
haar hi haar ho jaise miri qismat men likhi
jiit ka jashn manate hain chale jaate hain
tursh-rui kabhi hoti nahin itni achchhi
aate hi rang jamate hain chale jaate hain
yunhi ghut ghut ke marun hijr men kab tak un ke
maut vo meri bulate hain chale jaate hain
de ke darvaza-e-dil par mire aksar dastak
niind raton ki udate hain chale jaate hain
aap ka kya hai jalenge to jalenge ham log
aap to aag lagate hain chale jaate hain
raushni aap ka darkar hai shayad us se
khana-e-dil ko jalate hain chale jaate hain
aap ko dil hai milana to milaen ba-khushi
duur se haath milate hain chale jaate hain
is se behtar tha ki aate na abhi mere paas
aap kuchh der ko aate hain chale jaate hain
aap se dil ko lagana hai saza mere liye
khun-e-dil mera jalate hain chale jaate hain
kijiye kuchh to mohabbat ka miri pas-o-lihaz
kya isi tarah se aate hain chale jaate hain
aap ka farz hai apni kahin meri bhi sunen
hal-e-dil apna sunate hain chale jaate hain
aap se kis ne kaha tha ki abhi aa jaaen
aa ke ‘barqi’ ko satate hain chale jaate hain
Leave a Reply