haq nahin mujh ko shadmani ka
shukriya gham ki mehrbani ka
aap ke aur hamare aansu men
farq hai aag aur paani ka
hai mohabbat ka naam umr-e-abad
zikr hi kya hayat-e-fani ka
ḳhud mire dil ne meri ankhon ko
farz saunpa hai ḳhun-fishani ka
ahl-e-dil ki kahaniyan tauba
ek unvan hai har kahani ka
kyon na sargoshiyan hon mahfil men
faiz hai meri be-zabani ka
tere gham se siva ye gham hai hamen
jaane kya ho tiri nishani ka
sher rudad-e-dil hai naam nahin
sirf alfaz ki ravani ka
karvan ke ghubar men ‘ashraf’
chhup gaya rang zindagani ka
Leave a Reply