Haq Nahin Mujhko Shadmani Ka

haq nahīñ mujh ko shādmānī kā

shukriya ġham kī mehrbānī kā

aap ke aur hamāre aañsū meñ

farq hai aag aur paanī kā

hai mohabbat kā naam umr-e-abad

zikr hī kyā hayāt-e-fānī kā

ḳhud mire dil ne merī āñkhoñ ko

farz sauñpā hai ḳhūñ-fishānī kā

ahl-e-dil kī kahāniyāñ tauba

ek unvāñ hai har kahānī kā

kyoñ na sargoshiyāñ hoñ mahfil meñ

faiz hai merī be-zabānī kā

tere ġham se sivā ye ġham hai hameñ

jaane kyā ho tirī nishānī kā

sher rūdād-e-dil hai naam nahīñ

sirf alfāz kī ravānī kā

kārvāñ ke ġhubār meñ ‘ashraf’

chhup gayā rañg zindagānī kā

Leave a Comment