Zia Fatehabadi
dil apna said-e-tamanna hai dekhiye kya ho
havas ko ishq ka sauda hai dekhiye kya ho
kisi ke lamha-e-ulfat ki yad-e-kaif-avar
dil-e-hazin ka sahara hai dekhiye kya ho
bacha bacha ke rakha tha jise vahi kashti
supurd-e-mauja-e-dariya hai dekhiye kya ho
sukut-e-but-kada-e-azari se tang aa kar
ḳhuda ko main ne pukara hai dekhiye kya ho
shakeb-o-sabr ka paimana TuTne par bhi
vahi vafa ka taqaza hai dekhiye kya ho
hazar baar hi dekha hai sochne ka ma.aal
hazar baar hi socha hai dekhiye kya ho
‘ziya’ jo pi ke na bahka vo rind-e-mai-ḳhana
piye baghair bahakta hai dekhiye kya ho
Leave a Reply