shad-azimabadi

Agar Marte Hue Lab Par Na Tera Nam Aaega

agar marte hue lab par na tera naam aaega

to main marne se dar-guzra mire kis kaam aaega

use bhi thaan rakh saaqi yaqin hoga na rindon ko

agar zahid pahan kar jama-e-ehram aaega

shab-e-furqat men dard-e-dil se main us vaste khush huun

zaban par raat bhar rah rah ke tera naam aaega

lagi ho kuchh to qasid akhir is kam-bakht dil men bhi

vahan teri tarah jo jaega nakam aaega

isi ummid men bandhe hue hain taktaki mai-kash

kaf-e-nazuk pe saaqi rakh ke ik din jaam aaega

yahan apni padi hai tujh se ai gham-khvar kya uljhun

ye kaun aram hai mar jaun tab aram aaega

zahe izzat jo ho is bazm men mazkur ai vaaiz

bala se gar gunahgaron men apna naam aaega

hazar inkar ya qat-e-taalluq us se kar naseh

magar hir-phir ke honton par usi ka naam aaega

ata ki jab ki khud pir-e-mughan ne pi bhi le zahid

ye kaisa sochna hai tujh pe kyuun ilzam aaega

pada hai silsila taqdir ka sayyad ke bas men

chaman men ai saba kyunkar asir-e-dam aaega

koi badmast ko deta hai saaqi bhar ke paimana

tira kya jaega mujh par abas ilzam aaega

unhen dekhegi tu ai chashm-e-hasrat vasl men ya main

tire kaam aaega rona ki mere kaam aaega

hamesha kya piyunga main isi kohna-sifali main

mire aage kabhi to saghar-e-zarfam aaega

kahan se laun sabr-e-hazrat-e-ayyub ai saaqi

khum aaega surahi aaegi tab jaam aaega

chhuri thi kund teri ya tire qatil ki o bismil

tadap bhi tu tiri gardan pe kyuun ilzam aaega

yahi kah kar ajal ko qarz-khvahon ki tarah taala

ki le kar aaj qasid yaar ka paigham aaega

hamesha kya yuun hi qismat men hai ginti gina dena

koi naala na lab par laiq-e-anjam aaega

gali men yaar ki ai ‘shad’ sab mushtaq baithe hain

khuda jaane vahan se hukm kis ke naam aaega

More Poems

Leave a Comment