bala se khalq ho be-dard ishq kya gham hai
jarahat-e-dil-e-mahzun ka dard marham hai
jahan men gham se kui ishrat-kada nahin khali
hai shama bazm men giryan chaman men shabnam hai
huun ab-dida main nargis pe dekh kar shabnam
ki aah chashm ki surat bhi ashk se nam hai
rakhe hai lutf shabistan-e-bazm-e-munim lek
svad-e-sham-e-ghariban ka aur aalam hai
gulon ka chaak gareban hain bulbulen nalan
chaman men ‘ishq’ khuda jaane kis ka matam hai
Leave a Reply