ḳhud ko jab ḳhud se kisi roz riha.i dungi
main parindon ki tarah uḌti dikha.i dungi
zindagi tu mujhe kangan na bhi pahna be-shak
main tujhe hanste hue phir bhi kala.i dungi
mo.ajaze lafz mire ḳhalq karenge aise
chup rahi phir bhi zamane ko suna.i dungi
ghar men ḳhvabon ko lahu kar ke jala.ungi charagh
dar-o-divar ko ankhon ki kama.i dungi
tum mujhe hijr ki rudad suna dena bas
main tumhen zaḳhm hasin ashk tila.i dungi
aḳhiri baar uThana hai mujhe dard ka baar
aḳhiri baar mohabbat ki duha.i dungi
‘sa.adiya’ ahd buzurgon se nibha.ungi sada
haath ko ḳhuun se main rasm-e-hina.i dungi
Leave a Reply