mohabbat pe shayad zaval aa raha hai
ki ab zindagi ka saval aa raha hai
faza mahki mahki hai sehn-e-chaman ki
jo aaj ik yahan gul-misal aa raha hai
karun kis tarah un se tark-e-ta.alluq
mujhe un ke dil ka ḳhayal aa raha hai
ye kis ke tasavvur men ai jan-e-arman
tujhe bhi sar-e-bazm haal aa raha hai
guzar sa gaya saneha kya chaman men
gulon par jo rang-e-malal aa raha hai
ye dasht-e-havas hai jafaon ki duniya
idhar kyuun hujum-e-ghazal aa raha hai
vo bol uTThe dekha jo ashiq ko aate
idhar koi ashufta-hal aa raha hai
‘zafar’ ye hai us but ki yadon ka sadqa
shab-e-hijr lutf-e-visal aa raha hai
Leave a Reply