Haidar Ali Aatish
aarif hai vo jo husn ka juuya jahan men hai
bahar nahin hai yusuf isi karvan men hai
piiri men shughl-e-mai hai javanana roz-o-shab
bu-e-bahar aati hamari khizan men hai
hota hai gul ke sunghe se duuna girafta dil
mujh sa bhi bad-dimagh kam is bostan men hai
pusht-e-khamida dekh ke hota huun naara-zan
karta huun sarf-e-tir jo zor is kaman men hai
dikhla rahi hai dil ki safa do-jahan ki sair
kya aina laga hua apne makan men hai
divana jo na ishq se ho aadmi nahin
husn-e-pari ka jalva tilism-e-jahan men hai
parvanon ki tarah hai hujum-e-qadah-kashan
raushan charagh-e-bada jo mugh ki dukan men hai
us dilruba ke kuche men aage hava se jaae
itni to jaan ab bhi tan-e-na-tavan men hai
duniya se kuuch karna hai ik roz rahravo
bang-e-jaras se shor yahi karvan men hai
padh sakta sarnavisht ka matlab koi nahin
maalum kuchh nahin ki ye khat kis zaban men hai
ainda-o-ravinda ki chalti hain thokaren
jaada jo apna tha usi khvab-e-giran men hai
kushte hain baagh men bhi tiri tegh-e-naz ke
bu-e-shahid laala men aur arghavan men hai
ashiq ke rang-e-zard ko dekho to hans pado
tasir us men bhi hai vo jo zaafaran men hai
maadum vo kamar hai na mauhum vo dahan
kahte hain shaer un ke jo kuchh kuchh guman men hai
gul tutte hain hote hain bulbul asir-e-dam
sayyad mustaid madad-e-baghban men hai
sarkash ki manzilat hai subuk pesh-e-khaksar
vo tamkanat zamin ki kahan asman men hai
sumbul se hal-e-gul huun main ye kah ke puchhta
kis silsile men tu hai ye kis khandan men hai
dil men khayal-e-gesu-e-mushkin hai bad bala
ye murgh-e-ruh ke liye saanp ashiyan men hai
hikmat se hai ye khaak ka putla bana hua
nuur aankh men hai us ke to maghz ustukhan men hai
‘atish’ buland-paya hai dargah yaar ki
haftum falak ki rifat isi astan men hai
Leave a Reply