Guzra Hua Zamana Phir Yaad Aa Raha Hai

Poet

guzra hua zamana phir yaad aa raha hai

bhula hua fasana phir yaad aa raha hai

jo phuul ban gaya hai honTon par us ke aa kar

vo harf-e-mahramana phir yaad aa raha hai

jis men the chand taare mahbub the hamare

kyuun vo nigar-ḳhana phir yaad aa raha hai

vo do dilon ko jis ne hamraz kar diya tha

vo raz-e-dil-barana phir yaad aa raha hai

jis ki bisat ulaT di ai ‘soz’ asman ne

kyuun vo sharab-ḳhana phir yaad aa raha hai