jis tarah log ḳhasare men bahut sochte hain
aaj kal ham tire baare men bahut sochte hain
kaun halat ki sochon ke tamavvuj men nahin
ham bhi bah kar isi dhare men bahut sochte hain
hunar-e-kuza-gari ne inhen baḳhshi hai tarash
ya ye sab naqsh the gaare men bahut sochte hain
dhyan dharti ka nikalta hi nahin hai dil se
jab se utre hain sitare men bahut sochte hain
ab mohabbat men bhi ‘iqbal’ hamari auqat
kyuun nahin apne guzare men bahut sochte hain
Leave a Reply