aap ko gardish-e-ayyam se Dar lagta hai
aur hamen ishq ke anjam se Dar lagta hai
chashm-e-saqi ke ishare men nihan kya shai thi
hasrat-e-bada-e-gulfam se Dar lagta hai
zer-e-lab un ke tabassum se sukun maang to luun
apni hi jur.at-e-nakam se Dar lagta hai
naam jo aTh-pahr vird-e-zaban rahta tha
ab ye vahshat hai usi naam se Dar lagta hai
hazrat-e-ḳhizar se thi rahbari ki ḳhvahish
ab usi ḳhvahish-e-nakam se Dar lagta hai
manzilen ishq ki be-ḳhauf-o-ḳhatar tai kiin hain
ab ye aalam hai ki har gaam se Dar lagta hai
kyuun vazifa sahar-o-sham kiya tark ‘safir’
kyuun ḳhyal-e-sahr-o-sham se Dar lagta hai
Leave a Reply