dil ke rahne ke liye shahr-e-ḳhayalat nahin
sar-ba-sar hai nafi is men kahin isbat nahin
ranj gar vaan se to rahat bhi vahin se aave
kaun kahta hai yahan vahdat-e-ayat nahin
mujh se kahte hain hava.ej se sarokar na rakh
meri tarif ba-juz qissa-e-hajat nahin
koi batlao shab-o-roz pe kya guzri hai
raat ḳhamosh nahin din men koi baat nahin
thi falatun ki jo jamhur se ru-gardani
ham samajhte the ḳhurafat ḳhurafat nahin
dil se guzre kabhi dushman ke liye fikr-e-zarar
vo vatira nahin mera mire jazbat nahin
ahd-e-be-mehr men ik chaal mohabbat bhi chale
shah men baazi hai miri garche abhi maat nahin
sahiba dekhna had se na baḌhe yurish-e-gham
na-tavan dil hai mira ḳhema-e-sadat nahin
Leave a Reply