maali udaas hai na ye gulshan udaas hai
andhi men sirf ek nasheman udaas hai
jamuna ke tiir bajti hai ‘niru’ ki bansuri
‘ranjhe’ ka desh ‘hir’ ka madhuban udaas hai
mujh ko sakhi ka imtihan lena tha le liya
meri bala se gar mira daman udaas hai
mahlon men rahne vaale zara hoshiyar baash
mahlon ki samt dekh ke nirdhan udaas hai
ab ai luTe musafiro ma.alum to karo
rahbar ko kya hua hai jo rahzan udaas hai
pairon ki dhuul mathe ka chandan bani to kyuun
bas ye hi soch kar to barahman udaas hai
bad-shakl eqtidar ko bad-shakl kyuun kaha
darbar-e-adl men bhi ye darpan udaas hai
ambar se kah do badalon ko ab riha kare
jhulon ki rut hai bahnon ka angan udaas hai
Leave a Reply