Tamannaen Aziyyat Ka Nazara Hum Na Kahte The

Poet

tamanna.en aziyyat ka nazara ham na kahte the

ḳhasara hai ḳhasara hi ḳhasara ham na kahte the

tumhari intiha.en ant par be-sud nikli hain

samundar jitna gahra utna khara ham na kahte the

na tu bandon se hai raazi na bande tujh se raazi hain

ḳhuda.i rog hai parvardigara ham na kahte the

ye maidan-e-tag-dau hai mashaqqat hi mashaqqat hai

vahi jitega jo sau baar haara ham na kahte the

ghulami ko to azadi samajhte hain yahan insan

ye hathkaḌiyon men kar lenge guzara ham na kahte the

chuna tha tu ne jo rasta use ham tark kar aa.e

siyanon ko hai kaafi ik ishara ham na kahte the

sabhi ne apne tinke bhi bil-aḳhir ḳhud uTha.e hain

nahin hoga yahan koi sahara ham na kahte the

na ‘zishan’ agahi puuri hui umren huiin puuri

na hoga ilm ka koi kinara ham na kahte the