Hijr Hai Dil Mein KHak uDti Hai

hijr hai dil meñ ḳhaak uḌtī hai

sadr-e-mahfil meñ ḳhaak uḌtī hai

hai jo māh-e-siyām ai saaqī

kyā hī mahfil meñ ḳhaak uḌtī hai

vahī dil-jūīyāñ haiñ ba.ad-e-fanā

par mire dil meñ ḳhaak uḌtī hai

vo jo aatā nahīñ nahāne ko

bahr-o-sāhil meñ ḳhaak uḌtī hai

tire jalve se nuur ke badle

māh-e-kāmil meñ ḳhaak uḌtī hai

jis ko tujh se ġhubār hai ai ‘mehr’

us kī mahfil meñ ḳhaak uḌtī hai

Leave a Comment