ham jaise tegh-e-zulm se Dar bhi ga.e to kya
kuchh vo bhi hain jo kahte hain sar bhi ga.e to kya
uThti rahengi dard ki Tisen tamam umr
hain zaḳhm tere haath ke bhar bhi ga.e to kya
hain kaun se bahar ke din apne muntazir
ye din kisi tarah se guzar bhi ga.e to kya
ik makr hi tha aap ka ifa-e-ahd bhi
apne kahe se aaj mukar bhi ga.e to kya
ham to isi tarah se phirenge ḳharab-hal
ye sher tere dil men utar bhi ga.e to kya
‘basir’ tumhen yahan ka abhi tajraba nahin
bimar ho? paḌe raho, mar bhi ga.e to kya
Leave a Reply