Ainuddin Azim
karobari shahron men zehn-o-dil mashinen hain jism karḳhana hai
jis ki jitni amadani itna hi baḌa us ke hirs ka dahana hai
ye shu.ur-zade jo manfa.at-guzida hain haif un ki nazron men
be-gharaz mulaqaten aur ḳhulus ki baten fe.al-e-ahmaqana hai
apni zaat se qurbat apne naam se nisbat apne kaam se raghbat
apna ḳhol hi un ka ḳhitta-e-marasim hai ku-e-dostana hai
har ḳhushi ki mahfil men qahqahe luTate hain ḳhud hi luTte bhi hain
gham ki majlison men bhi sab ka apna apna sar apna apna shana hai
jin buland shaḳhon par narm-rau havaen hain bijliyon ka dar bhi hai
irtiqa ke jangal men hadsat ki zad par sab ka ashiyana hai
tarz-e-baghbani men shiddat-e-numu-ḳhezi kaise gul khilaegi
nim-va shagufon ke rang-e-dil-farebi men bu-e-tajirana hai
jagmagate bam-o-dar jhilmilate rauzan hain chamchamati dahlizen
zahiri chamak ‘azim’ turra-e-sharafat hai raunaq-e-zamana hai
Leave a Reply