saat dariyaon ka paani hai mire kuuze men
band ik taaza kahani hai mire kuuze men
tum use paani samajhte ho to samjho sahab
ye samundar ki nishani hai mire kuuze men
mere aaba ne javani men mujhe saunpa tha
mere aaba ki javani hai mire kuuze men
dekhne vaalo na.e naqsh milenge tum ko
sochne vaalo girani hai mire kuuze men
jaane kis ḳhaak se ye zarf hua hai ta.amir
jaane kis ghaaT ka paani hai mire kuuze men
aan ki aan guzarta hai zamana is par
vaqt ki naql-e-makani hai mire kuuze men
charon samton men koi shai bhi agar hai maujud
is ne vo la ke girani hai mire kuuze men
qarz hai mujh pe jo ik aks-e-tamanna ‘azar’
us ne kya shakl banani hai mire kuuze men
Leave a Reply