Bahadur Shah Zafar
na do dushnam ham ko itni bad-khui se kya hasil
tumhen dena hi hoga bosa kham-rui se kya hasil
dil-azari ne teri kar diya bilkul mujhe be-dil
na kar ab meri dil-jui ki dil-jui se kya hasil
na jab tak chaak ho dil phans kab dil ki nikalti hai
jahan ho kaam khanjar ka vahan suui se kya hasil
burai ya bhalai go hai apne vaste lekin
kisi ko kyuun kahen ham bad ki bad-goi se kya hasil
na kar fikr-e-khizab ai shaikh tu piiri men jaane de
javan hona nahin mumkin siyah-rui se kya hasil
chadhae astin khanjar-ba-kaf vo yuun jo phirta hai
use kya jaane hai us arbada-jui se kya hasil
abas pamba na rakh dagh-e-dil-e-sozan pe tu mere
ki angare pe hoga charagar ruui se kya hasil
shamim-e-zulf ho us ki to ho farhat mire dil ko
saba hovega mushk-e-chin ki khushbui se kya hasil
na hove jab talak insan ko dil se mel-e-yak-janib
‘zafar’ logon ke dikhlane ko yaksui se kya hasil
Leave a Reply