Qateel Shifai
us par tumhare pyaar ka ilzam bhi to hai
achchha sahi ‘qatil’ pa badnam bhi to hai
ankhen har ik hasin ki be-faiz to nahin
kuchh sagaron men bada-e-gulfam bhi to hai
palkon pe ab nahin hai vo pahla sa bar-e-gham
rone ke ba.ad kuchh hamen aram bhi to hai
aḳhir buri hai kya dil-e-nakam ki ḳhalish
saath us ke ek lazzat-e-be-nam bhi to hai
kar to liya hai qasd ibadat ki raat ka
raste men jhumti hui ik shaam bhi to hai
ham jante hain jis ko kisi aur naam se
ik naam us ka gardish-e-ayyam bhi to hai
a tishna-kam-e-shauq ise aazma ke dekh
vo aankh sirf aankh nahin jaam bhi to hai
munkir nahin koi bhi vafa ka magar ‘qatil’
duniya ke samne mira anjam bhi to hai
Leave a Reply