apne ashkon ki ye barsat kise pesh karun
shab-e-furqat ki ye saughat kise pesh karun
gham-e-dauran ki shikayat gham-e-janan ka gila
uf ye pechida ḳhayalat kise pesh karun
kaun puchhega mire hal-e-fasurda ka mizaj
gham-e-dauran ki hikayat kise pesh karun
ziist ko talḳh banate hain jo har-dam meri
uljhe uljhe vo savalat kise pesh karun
muntashir ho gaya shiraza-e-ulfat afsos
dil ke bikhre hue zarrat kise pesh karun
gham ki tash.hir se ho jaati hai tauhin-e-vafa
is aziyyat ke hisabat kise pesh karun
chun ke ash.ar ghazal ke main suna.un kis ko
dil se umDe hue naghmat kise pesh karun
aaj bhi vo to nazar aate hain ma.il-ba-sitam
aur phir shauq ke jazbat kise pesh karun
Leave a Reply