Abhi KHayal-O-Nazar Ka Ghubar Rah Mein Hai

abhī ḳhayāl-o-nazar kā ġhubār raah meñ hai

bahār aa ke rahegī bahār raah meñ hai

baḌhe chalo ki vo manzil abhī nahīñ aa.ī

ye vo maqām hai jis kā shumār raah meñ hai

hamārā kyā hai divāne haiñ kuchh bhī kar guzreñ

yaqīñ karo ki tumhārā vaqār raah meñ hai

na paañv thamte haiñ apne na hausle dil ke

sunā hai jab se koī ḳhār-zār raah meñ hai

nazar lage na kahīñ us ko chāñd-tāroñ kī

jo ek zarra-e-gardūñ-shikār raah meñ hai

Leave a Comment