nikharna aql-o-ḳhirad ka agar zaruri hai
junun ki rahbari men safar zaruri hai
haqiqaton se jo hota hai ashna ai dost
to is ke vaste rah-e-ḳhatar zaruri hai
kisi ki nichi nazar ka salam saath rahe
safar ke vaste zad-e-safar zaruri hai
magar ye shart hai har lafz ruuh se nikle
dua-e-nim-shabi men asar zaruri hai
dilon ka haal na chehron se ho sake zahir
ḳhirad ke daur men ye bhi hunar zaruri hai
‘obaid’ dusron ko kar chuke bahut talqin
ab apne aap pe bhi ik nazar zaruri hai
Leave a Reply