Hakeem Manzoor
Dhal gaya jism men a.ine men patthar men kabhi
chhup saka main na kisi rang ke paikar men kabhi
main yahi nuqta-e-mauhum rahunga na sada
main jhalak uTThunga aḳhir kisi manzar men kabhi
vo samundar ki baḌa.i se hai mar.ub ki vo
tishna-lab ban ke raha hai na samundar men kabhi
tujh pe khul ja.enge ḳhud apne bhi asrar ka.i
tu zara mujh ko bhi rakh apne barabar men kabhi
dekhte hain dar-o-divar harifana mujhe
itna be-bas bhi kahan hoga koi ghar men kabhi
asl men kuchh bhi na tha chand lakiron ke siva
ham bhi rakhte the yaqin harf-e-muqaddar men kabhi
us se kya puchhte ham apne ma.ani ‘manzur’
phuul khilte nahin dekhe kisi banjar men kabhi
Leave a Reply