Jine Ke Agar Chand Sahaare Bhi Mile Hain

jiine ke agar chand sahare bhi mile hain

to jaan se jaane ke ishare bhi mile hain

har chand rah-e-ishq ke gham saḳht hain lekin

is raah ke kuchh gham hamen pyare bhi mile hain

kuchh apni vafaon se jo ummid thi ham ko

kuchh un ki nigahon ke sahare bhi mile hain

ai rah-rav-e-rah-e-junun bhuul na jaana

is raah men ji jaan se haare bhi mile hain

ilzam-e-taghaful hamen taslim hai lekin

badle hue andaz tumhare bhi mile hain

kya kijiye tadbir se haara nahin jaata

go raah men taqdir ke maare bhi mile hain

tufan men sabhi duub to jaate nahin ‘aḳhgar’

kuchh logon ko tufan men kinare bhi mile hain

Leave a Comment