Aaj Mail-Ba-Karam Ek but-E-Ranai Hai

Bakhtiyar Ziya

aaj ma.il-ba-karam ik but-e-ra.ana.i hai

saari duniya mire daman men simaT aa.i hai

husn masruf-e-tajalli-o-ḳhud-ara.i hai

vo tamasha hi nahin ḳhud bhi tamasha.i hai

aap se pahle kahan gham se shanasa.i thi

mil ga.e aap to har gham se shanasa.i hai

is tarah dekhna jaise mujhe dekha hi nahin

ye ada aap ki ḳhud maz.har-e-yakta.i hai

chand kaliyan hi nahin saara chaman apna hai

kaun Tokega hamen kis ki qaza aa.i hai

jis men dahke hue sho.ale ki si tasir na ho

vo ‘ziya’ sher nahin qafiya-paima.i hai