rah-e-janan pe baḌhti ja rahi huun
magar ḳhud se bichhaḌti ja rahi huun
anokhe shahar mujh par va hue hain
kitab-e-zat paḌhti ja rahi huun
mire maula use abad rakhna
mira kya hai ujaḌti ja rahi huun
miri nash-o-numa jis se hui hai
usi jaḌ se ukhaḌti ja rahi huun
hua malum mujh ko aḳhir-e-shab
ki main be-samt baḌhti ja rahi huun
bura hai vo magar itna nahin hai
yunhi us se bigaḌti ja rahi huun
kahan le ja raha hai mujh ko ‘sughra’
muqaddar se jhagaḌti ja rahi huun
Leave a Reply