bhara hua tiri yadon ka jaam kitna tha
sahar ke vaqt taqaza-e-sham kitna tha
ruḳh-e-zaval pe rang-e-davam kitna tha
ki ghaT ke bhi mira mah-e-tamam kitna tha
tha tere naaz ko kitna miri ana ka ḳhayal
mira ghurur bhi tera ghulam kitna tha
jo pau phaTi to har ik dastan tamam hui
ajab ki un ke liye ehtimam kitna tha
unhin ko yaad kiya jab to kuchh na yaad aaya
vo log jin ka zamane men naam kitna tha
abhi shajar se juda.i ke din na aa.e the
paka hua tha vo phal phir bhi ḳhaam kitna tha
vahan to koi na tha ek apne gham ke siva
mire makan pe magar izhdiham kitna tha
Leave a Reply