Jab Kaho Kyun Ho Khafa Kya Bais

jab kaho kyuun ho khafa kya baais

kahte hain puchhne ka kya baais

bholi surat ki hai khubi varna

ho adu dost-numa kya baais

main ne ki aah to bole nagah

ho gae garm hua kya baais

aata hai dekh ke anjum ko khayal

hai falak abla-pa kiya baais

vaada karne ki zarurat kya thi

phir na aane ka bhala kya baais

gar na thi hijr men ummid-e-visal

jiite rahne ka hua kya baais

dam nikalta hai mira ruk ruk kar

kunad hai tegh-e-qaza kya baais

chashma-e-khizr men mai hi be-shak

aab ho umr-faza kya baais

tum karo tark-e-jafa kya imkan

ham karen tark-e-vafa kiya baais

naala karta nahin ‘nazim’ tasir

tiir hota hai khata kya baais

Leave a Comment