Mutakabbir Na Ho Zardar Badi Mushkil Hai

mutakabbir na ho zardar badi mushkil hai

sab hai asan ye sarkar badi mushkil hai

kufr par khalq hai tayyar badi mushkil hai

diin bilkul nahin darkar badi mushkil hai

kaise tedha na chale maar badi mushkil hai

sidhi ho zulf-e-girah-dar badi mushkil hai

aur honge vo koi daam men aane vaale

murgh-e-dana ho giraftar badi mushkil hai

dil hai ghamnak to kaunain hai matam-khana

rote hain sab dar-o-divar badi mushkil hai

log kahte hain ki dil us ko na dena lekin

baad iqrar kai inkar badi mushkil hai

shoala-e-husn-e-butan phunk na de aalam ko

surkh hain phuul se rukhsar badi mushkil hai

in dinon hazrat-e-yusuf ki vo na-qadri hai

nahin budhiya bhi kharidar buri mushkil hai

mil ke rahna hi nahin janta yaan ab koi

jan-o-dil men bhi hai takrar badi mushkil hai

na taraddud ka maza hai na sukun ki lazzat

kabhi vaada kabhi inkar badi mushkil hai

talib-e-sulh huun main aur nazar talib-e-jang

raat din ladne pe tayyar badi mushkil hai

haae duniya men kisi men nahin itni bhi vafa

jitna kutta hai vafadar badi mushkil hai

aaj tum tegh-ba-kaf ho to safa-chat maidan

kaun marne pe ho tayyar badi mushkil hai

jins-e-dil bechne ki ham ko zarurat ‘parvin’

aur maadum kharidar badi mushkil hai

Leave a Comment