yaad aayā na karo dil ko jalāne vaale
ham nahīñ ab ke tirā hijr manāne vaale
ġham sunāne ke liye maiñ bhī chalā jā.ūñgā
log mil jaa.e agar ashk bahāne vaale
niiñd is baar mirā saath nahīñ degī kabhī
ḳhvāb is baar nahīñ haath meñ aane vaale
aa kisī roz mire sāmne ik baar kahīñ
ḳhvāb meñ aa ke mirī niiñd churāne vaale
maiñ rahā aur mirā kaam rahā duniyā meñ
miT ga.e jaḌ se mirā naam miTāne vaale
zindagī dūsrā ghar dekh koī apne liye
ham nahīñ ab ke tirā bojh uThāne vaale
phir se kartā huuñ mohabbat kī shurūāt ‘vaqās’
ḳhat jalātā huuñ sabhī aaj purāne vaale