Asifa Nishat
daryaft kar liya hai basaya nahin mujhe
saman rakh diya hai sajaya nahin mujhe
kaisa ajiib shakhs hai uth kar chala gaya
barbad ho gaya to bataya nahin mujhe
vo mere khvab le ke sirhane khada raha
main so rahi thi us ne jagaya nahin mujhe
baazi to us ke haath thi phir bhi na jaane kyuun
mohra samajh ke us ne badhaya nahin mujhe
us ne hazar ahd-e-mohabbat ke bavajud
jo raaz puchhti huun bataya nahin mujhe
vo intiha-e-shauq thi ya intiha-e-zabt
tanhai men bhi haath lagaya nahin mujhe
Leave a Reply