zinda hain mire ḳhvab ye kab yaad hai mujh ko
haan tark-e-mohabbat ka sabab yaad hai mujh ko
tafsil-e-inayat to ab yaad nahin hai
par pahli mulaqat ki shab yaad hai mujh ko
ḳhushbu ki rifaqat ka nasha TuuT raha hai
lekin vo safar dad-talab yaad hai mujh ko
ab shaam ke hathon jo giraftar hai suraj
dopahar men tha qahr-o-ghazab yaad hai mujh ko
aivan miri ruuh ke raushan kiye jis ne
vo shoḳhi-e-yak-jumbish-e-lab yaad hai mujh ko
kuchh din se muqayyad huun main virana-e-jan men
halanki koi shahr-e-tarab yaad hai mujh ko
kyuun yaad dilate ho mujhe chandni raten
paiman-e-vafa tum se hai sab yaad hai mujh ko
vo shaḳhs ‘ḳhayal’ aaj jo ru-posh hai mujh men
the us men kamalat ajab yaad hai mujh ko
Leave a Reply