use pahle pahal achchhā lagegā
nayā rasta nayā rasta lagegā
ta.alluq toḌnā mushkil nahīñ hai
yahī ki dūsrā jhaTkā lagegā
mirā ehsān hai tujh par mohabbat
agar aisā kahūñ kaisā lagegā
tumhāre naam kā chaltā hai sikka
kaho kuchh bhī kaho achchhā lagegā
mire vahm-o-gumāñ meñ bhī nahīñ thā
ye sadma is qadar gahrā lagegā
yahī sab jaan kar chhoḌā thā us ko
vo apnā hai to phir apnā lagegā