Tousief Tabish
main us se baat karne ja chuka tha
magar vo shaḳhs aage ja chuka tha
mujhe dariya ne phir uupar bulaya
main us ki had se niche ja chuka tha
tire naqsh-e-qadam par chalte chalte
main tujh se kitna aage ja chuka tha
paḌha.i ḳhatm karke jab main lauTa
koi afsar use le ja chuka tha
vo chalne ko to raazi ho ga.i thi
magar jab main akele ja chuka tha
sada.en de raha tha vo palaT kar
magar main apne raste ja chuka tha
main ḳhud ko rok bhi sakta tha ‘tabish’
ki mera vaqt pichhe ja chuka tha
Leave a Reply