Shahnawaz Ansari
na.e ḳhayalon se rabta kar na.i zaminon pe sha.iri kar
jo ishq karti hain sha.iri se ab un hasinon pe sha.iri kar
siyah raten udaas jugnu aur us pe suraj ki be-niyazi
ab ek misra tarash aise tu aaj tinon pe sha.iri kar
samundaron ke vo shahzade tamam lahron se ashna the
jinhon ne dariya ke paanv bandhe the un safinon pe sha.iri kar
tu nukta-chinon ki baat mat kar ye apni zid par aḌe rahenge
jo log pagal hain mere jaise unhin zahinon pe sha.iri kar
meri buzurgon se dosti hai so astanon pe likh raha huun
tu apne yaron se bad-guman hai to astinon pe sha.iri kar
jo ghar basane ki aarzu hai to apne ghar se nikal ḳhud ko
abhi makanon pe Daal miTTi abhi makinon pe sha.iri kar
Leave a Reply