Salam Machhli Shahri
ab ayadat ko miri koi nahin aa.ega
phir huun bimar kisi ko na yaqin aa.ega
gham musalsal ho to ahbab bichhaḌ jaate hain
ab na koi dil-e-tanha ke qarin aa.ega
apne ḳhvabon ke darichon men jala lo sham.en
aur ye soch lo ik mah-jabin aa.ega
phir nigar-e-chaman-e-vadi-e-farda-e-bahar
gul-ba-dast-e-mah-o-anjum ba-jabin aa.ega
zehn-e-taza ke liye saz-e-haqiqat chheḌo
chain ise sirf taḳhayyul se kahin aa.ega
sirf apne hi aza.em pe bharosa kar le
kaam koi bhi na ai qalb-e-hazin aa.ega
roz puuja ke liye phuul sajata hai ‘salam’
jaane kab us ka ḳhuda su-e-zamin aa.ega
Leave a Reply