qasr-e-janan tak rasai ho kisi tadbir se
tair-e-jan ke liye par maang luun main tiir se
un ko kya dhoka hua mujh na-tavan ko dekh
meri surat kyuun milate hain miri tasvir se
galiyan de kar ba-ja-e-qum ke ai rashk-e-masih
aap ne murde jilae hain nai tadbir se
sadqe ai qatil tire mujh tishna-e-didar ki
tishnagi jaati rahi ab-e-dam-e-shamshir se
ishve se ghamze se shokhi se ada se naaz se
mitne vaala huun mita diije kisi tadbir se
ik saval-e-vasl par do do sazaen diin mujhe
tegh se kaata zaban ko si diye lab tiir se
kuchh na ho ai inqilab-e-asman itna to ho
ghair ki qismat badal jaae meri taqdir se
zindagi se kyuun na ho nafrat ki mahv-e-zulf huun
qaid-e-hasti mujh ko ‘bedam’ kam nahin zanjir se
Leave a Reply