Teri Yaad

main tiri yaad ko siine se lagae guzra

ajnabi shahr ki mashghul guzar gahon se

bevafai ki tarah phaili hui rahon se

nai tahzib ke abad bayabanon se

dast-e-mazdur pe hanste hue aivanon se

main tiri yaad ko siine se lagae guzra

gaanv ki do-pahri dhuup ke sannaton se

khushk nahron ke kinaron pe thaki chhanv se

apne dil ki tarah roi hui pag-DanDi se

main tiri yaad ko siine se lagae pahuncha

bastiyan chhod ke tarse hue viranon men

talkhi-e–dahr samete hue mai-khanon men

khun-e-insan pe palte hue insanon men

jaane pahchane hue logon men an-janon men

main tiri yaad ko siine se lagae pahuncha

apne ahbab tire gham ke parastaron men

apni ruthi hui taqdir ke gham-khvaron men

apne ham-manzil-o-ham-rasta fankaron men

aur fankar ki sanson ke kharidaron men

main tiri yaad ko siine se lagae pahuncha

ye samajh kar ki koi aankh idhar utthegi

meri maghmum nigahi ko mujhe samjhegi

lekin a dost ye duniya hai yahan tera gham

ek insan ko taskin bhi de sakta hai

ek insan ka aram bhi le sakta hai

khuun men Duubi hui tahrir bhi ban sakta hai

ek fankar ki taqdir bhi ban sakta hai

saari duniya ke magar kaam nahin aa sakta

sab ke honton pe tira naam nahin aa sakta

Leave a Comment