khair yunhi sahi taskin ho kahin thodi si
”han” to kahte ho magar saath ”nahin” thodi si
hal-e-dil sun ke mira barsar-e-rahmat to hain kuchh
abhi baaqi hai magar chin-e-jabin thodi si
hui jaati hai sahar aisa bhi ghabrana kya
raat gar hai bhi to ai mah-jabin thodi si
jam-e-mai dekh ke labrez kis andaz ke saath
us ka kahna ki nahin, itni nahin, thodi si
be-khudi ye dam-e-rukhsat thi ki sab kuchh bhula
un ki baten bhi mujhe yaad rahin thodi si
ab ye paigham kisi ka koi le kar jaae
abhi lab par hai mire jan-e-hazin thodi si
yuun to tum roz hi kahte ho sabhi kuchh mujh se
aaj ki baat hui zehn-nashin thodi si
un se kuchh kah na saka main shab-e-gham ki baten
go ki bhula tha magar yaad bhi thiin thodi si
bosa to us lab-e-shirin se kahan milta hai
galiyan bhi milin ham ko to milin thodi si
ab to sab ka tire kuche hi men maskan thahra
yahi abad hai duniya men zamin thodi si
utthe jaate hain hamin aap na baithen khamosh
aap ki baat samajhte hain hamin thodi si
yaad kuchh aa ke ye halat hui meri ki na puchh
pichhli ghadiyan shab-e-gham ki jo rahin thodi si
subh tak shaam se vo go ki rahe paas mire
hasraten dil ki magar rah hi gaiin thodi si
koste kya ho abhi hote hain ham shadi-e-marg
gar mile dafn ko kuche men zamin thodi si
sab mira haal vahan kaise kahega qasid!
tu to sunta hai miri baat nahin thodi si
daulat-e-faqr se sab ho gai taskin ‘nizam’
ab karen kya talab-e-taj-o-nagin thodi si
Leave a Reply