bahut ḳhajil hain ki ham ra.egan bhi zinda rahe
jahan pe tu bhi nahin tha vahan bhi zinda rahe
ajiib shart hai is be-yaqin mizaj ki bhi
ki tu bhi paas ho tera guman bhi zinda rahe
tujhe pe zid hai magar is tarah nahin hota
ki tu bhi zinda rahe dastan bhi zinda rahe
vo kaun log the jin ka vajud jism se tha
ye kaun hain jo pas-e-jism-o-jan bhi zinda rahe
jo ye na ho to suḳhan ka koi javaz nahin
zamir zinda rahe to zaban bhi zinda rahe
ye ka.enat faqat manfa.at ka naam nahin
koi yahan pe bara.e ziyan bhi zinda rahe
adam men jo bhi nahin tha vo sab vajud men tha
ye ham hi the jo kahin darmiyan bhi zinda rahe
Leave a Reply