aa ke sajjada-nashin qais hua mere baad
na rahi dasht men khali koi ja mere baad
miyan men us ne jo ki tegh-e-jafa mere baad
khun-girafta koi kya aur na tha mere baad
dosti ka bhi tujhe paas na aaya he he
tu ne dushman se kiya mera gila mere baad
garm-bazari-e-ulfat hai mujhi se varna
koi lene ka nahin nam-e-vafa mere baad
munh pe le daman-e-gul roenge murghan-e-chaman
baagh men khaak udaegi saba mere baad
chaak isi gham se gareban kiya hai main ne
kaun kholega tire band-e-qaba mere baad
ab to hans hans ke lagata hai vo mehndi lekin
khuun rula dega use rang-e-hina mere baad
main to gulzar se dil-tang chala ghuncha-ravish
mujh ko kya phir jo koi phuul khila mere baad
vo hava-khvah-e-chaman huun ki chaman men har subh
pahle main jaata tha aur bad-e-saba mere baad
sun ke marne ki khabar yaar mire ghar aaya
yaani maqbul hui meri vafa mere baad
zabh kar ke mujhe nadim ye hua vo qatil
haath men phir kabhi khanjar na liya mere baad
meri hi zamzama-sanji se chaman tha abad
kiya sayyad ne ik ik ko riha mere baad
aa gaya biich men us zulf ki ik main nadan
na hua koi giraftar-e-bala mere baad
qatl to karte ho par khuub hi pachhtaoge
mujh sa milne ka nahin ahl-e-vafa mere baad
barg-e-gul laai saba qabr pe meri na nasim
phir gai aisi zamane ki hua mere baad
gir pade aankh se us ki bhi yakayak aansu
zikr mahfil men jo kuchh mera hua mere baad
zer-e-shamshir yahi soch hai maqtal men mujhe
dekhiye ab kise laati hai qaza mere baad
shart-e-yari yahi hoti hai ki tu ne ‘ghafil’
bhuul kar bhi na mujhe yaad kiya mere baad