Majeed Amjad
kya ruup dosti ka kya rang dushmani ka
koi nahin jahan men koi nahin kisi ka
ik tinka ashiyana ik ragni asasa
ik mausam-e-baharan mehman do ghaḌi ka
aḳhir koi kinara is sail-e-be-karan ka
aḳhir koi mudava is dard-e-zindagi ka
meri siyah shab ne ik umr aarzu ki
larze kabhi ufuq par taaga sa raushni ka
shayad idhar se guzre phir bhi tira safina
baiTha hua huun sahil par nai-ba-lab kabhi ka
is iltifat par hon laakh iltifat qurban
mujh se kabhi na phera ruḳh tu ne be-ruḳhi ka
ab meri zindagi men aansu hain aur na aahen
lekin ye ek miTha miTha sa rog ji ka
o muskurate taaro o khilkhilate phulo
koi ilaaj meri ashufta-ḳhatiri ka
Leave a Reply